L'horru asturianu, paxina'n bable

TÁ EN: SOLOMADERA.COM ► CARPINTERÍA D'ARMAR ►►HORRU ASTURIANU

Conteniu d'esta páxina:

- Descripción del horru asturianu - Secuencia virtual d’arteyamientu - Otros obxetos de madera

Nesta páxina presento un estremiscu de lo que deprendí al rodiu del horru asturianu nestos años d’oficiu. Tento describir el so conceutu y construcción pentemedies de cada pieza y el so motivu. Utilizo los términos que m’enseñaron en casa y debroco otres acepciones que fuí atropando.

Si quier añedir, correxir o discutir cualisquier información, por favor, fágame sabelo. Taré encampanáu de siguir deprendiendo.

Por andar ente horros, voi alcontrando otres curiosidaes de madera que también amueso: (acaldándose)
	*El llabiegu*		*El carru rinchón*	*La pesllera de chaplón*	*La vara yerba*

Pa pescanciar el nacimientu y la evolución del Horru Asturianu ye mester alluganos nel contestu. Les primeres referencies aprucen nel sieglu IX, en títulos de propiedá y compraventa, ensin que quedare constancia de cómo yeren. Ye nel XIV cuando apicalben les primeres descripciones deseñaes y gráficos.

L’aniciu cimeru d’esta pecuñar construcción ta na necesidá de ensuchar, abeyar y caltener les colleches y matacios nun clima albadíu y llovederu. El so esporpolle y evolución taben condicionaos pela coxuntura socioeconómica. Usábense los materiales balfacos de cada fastera y construyíase afaciéndose al tarrén. El fierro yera caro y el so usu arratábase a les necesidades más pruyidiegues.

Asturies taba anubrida de viesques centenaries, de especies llariegues y de castañal, cultivada de magar los tiempos del Imperiu Romanu. Esta situación camudó dafechu cuando nel sieglu XVI socortóse too aquello que valiera pa la construcción naval, cuantusimás si taba cerque de dalgún riu que lo tresportare. L’Armada Invencible camudó’l nuesu paisaxe, que vien enllenándose de vaques y ocalitos.

La construcción del horru empicipiaba con mucha alantadura. Escoyíense los árboles que se socortaríen pel iviernu: cuatro bones toces, dreches y ensin ñudos, pa los trabes; unes falques curties y gordes pa pegollos, engüelgos y colondres; pa lliños, toques y aguilones valíen árboles menos bultables ; y les falques necesaries p’aserrar unos ochenta chaplones pa pontes, cabrios, calzos, talameres, faldones y bocateyes. Tronzábense y escorteyábense les falques; les vigues estabazábense; los engüelgos esvaciábense; y aserrábense los chaplones. Les vigues y pieces gordes sapozábense pa curar en folleros o remanos; colondres y otres tables atroxábense a solombra en llugar nariáu pero abellugáu del vientu. Y asina pasaben dellos años.

El montaxe del horru entama col allugamientu de los pilpayos, qu’en xeneral son piedres grandes y pandes. Escávase el tarrén hasta alcontrar firme y rásiase la baxera. Asítiense les piedres hasta que coluxen del tarrén y queden al mesmu rayente. La necesidá de refuxir los saltuyones del tarrén, o aprovechar al máximu lo pando, solleva que los pilpayos algamen tornar n’otra edificación. Arriendes de ser la murueca del horru, tienen de restribar de la humedanza la basa del pegollu

L’horru ye una triba de celleru: una cámara nairiada, y desamecida de mugaraes y royedores. Ye una construcción tradicional en dellos países y cultures, coles peculiaridaes de cada casu.

El que describo equí ye’l marniegu de la fastera central d’Asturies; que coincide, dicalluéu, col reconocíu pelos eruditos como “Horru Patrón”.

Usábense cásique namái maderes de castañal y carbayu, ensin qu’hebia una pauta estricta na so aplicación. Ye mui frecuente alcontrar la mestría de dambes: carbayu pa les vigues y castañal pa les tables.

Sobro los pilpayos afítense los pegollos, bien aplombaos y a la midida de los trabes que tenemos cortaos. La so función ye desamecer la cámara de la humedanza del suelu y al facelos más altos algámase un duble aprovechamientu del tarrén, apruciendo el “solhorru”. Ye corriente alcontralos de piedra caliar y arenisca na costa; de madera, preferentemente carbayu, nel interior; y de xaracos de piedra nel occidente.
	Pegollos de piedra

	Pegollu de xaracos	Prefabricados de formigón	Pegollos de madera

Arruma qu’el nome de “mueles” remanez de la costume d’aprovechar les piedres foliaes de los molinos. La so función ye tornar l’accesu de los royedores y el material preferíu ye la piedra caliar.

Apósase la tiesta del pegollu y la muela hasta que esta queda equilibrada y anivelada, y sobro ella afítase la taza birllicando la piedra. Esta pequeña pieza, polo regular de carbayu, tresmite el pesu de la cámara y el teyáu a los pegollos. El tomu de la taza nun tien de ser mayor qu’el de la tiesta del pegollu, y tien de quedar dafechamente centrada sobro esta.

La orientación del horru ye desenfilerada y al aviesu de la casa: enfilérase a siesgu del vientu primacial, pa que nun bulla; y la puerta allúgase al norte pa que nun entre la caldina. Les paredes al sur caltiénense aisllaes pel branu colos productos que s’encolinguen a ensuchar.

Colos trabes axéitase’l “cuadru” qu’acostina la cámara y el teyáu. Allúgase primero el alanteru (puerta) y el traseru. La encualladura fáise a tríncón nes primeres tres cuartes partes de la viga (d’afuera parciadientro). El restu encaxérase’n cuatro quintos del altor. Ye corriente alcontrar esta xuntura reforzada na so plana baxera per aciu d’una cruz fecha con dos vigues menores, que apellamos “carceleres”.

Vigues carceleres

El cogote o cabeza ye’l retayu de viga que queda dende l’encualle hasta l’estremu (tiesta) de la viga, y del so llargor depende l’aguante del encualle. Nos “lliños”, los cogotes reciben el nome específicu de cabezueles y son ún de los allugos marniegos d’espresión artística en forma de talla y otros orniatos.

Metanes de los trabes llaterales mángase’l sovigañu, que xebra en dos el vanu del suelu de la cámara y tresmite a los trabes llaterales una parte del pesu d’ésti. Antiguamente engolábense pentemedies de gatos de madera que s’afitaben con tornos al trabe, pasando colos años a facelo con estribos metálicos, remanecios abondes vegaes de los bandones zagurrios de los carros.

Desque encaxináu el cuadru, comprobaremos el plombu de los pegollos y los rayentes de los trabes. La primer estimanza facémosla a mano, emburriando un de los pegollos. Si el peteru cimbla bonablemente, endicia que los pegollos tan bien afitaos, pero estes coses nun pasen. Per aciu de un sopalancu y una lleva (anguañu sedría un poliyu axustable) que sofitamos nes testeres de los trabes alanteru y traseru, allevantamos adulces cada corneyal, y los pegollos tornen al so sitiu. Aprovechamos pa correxir los rayentes, camudando les taces o rebaxándoles. Esta operación repetirémosla desque asitiemos los lliños.

Na plana interior de los trabes alanteru y traseru ficimos les regadures qu’agospiarán los chaplones qu’axeiten el suelu, les pontes. Na ralura de la puerta abrimos esta regadura hasta la plana cimera del trabe pa da-yos entrada a les pieces.

Tamién ye costumao la construcción de suelos “soyaos”, per aciu de pontones y tabla mangada “a hueso”. Los pontones enconten sobro el sovigañu y encaxérense nos trabes. Esta igua ye relativamente moderna, ya que solleva el claváu de la tabla.

El sobigañu y les pontes

Suelu soyau

La merma de les pieces fai que colos años, les xuntes nel suelu se faigan demasiao anches. Entós axustámoles otra vuelta, faciéndoles correr pola regadura, dende’l centru haza dambos llaos. Facemos coincidir tola ralura cola entrada que ficimos na puerta ya inxerimos una ponta de la midida afayadiza.

Ye condición esencial que la cámara tea bien nairiada, asina que les xuntes ente pontes y ente cabrios son necesaries. Per contra paez desafayadizo que hebia corriente d’aire, ya que cada colondra axúntase a les deseguíes per aciu de regadura y peine.

L’engüelgu ye la pieza de perfil angular qu’encadarma cada corneyal de la parea. Cada vera tien unos cincuenta centímetros de anchor, polo poco, y grosez d’unos seis o siete centímetros, talo que les colondres. El llargor ye de, dicalluéu, un metru y mediu. Estes pieces axéitense esvaciando un troncu (falca) y dexaron de facese nel sieglu XIX, coincidiendo col esanicie de les castañales centenaries que se necesitaben.

Denomamos colondra al peteru de parea que zarra la cámara (engüelgos inxeríos); y también a cada una de les pieces que la encadarma (sacantes los engüelgos)

Metanes de la plana cimera de los trabes facemos gargallu pa la colondra. La goña más antigua yera faciendo caxes a la midida, tres o cuatro pa les espigues de cada pieza. La evolución cabera aporta a una regadura continua.

De la que visitamos los horros antiguos rescampla (o dámonos testeronazos) l’escasu altor valible, mesmo na cámara, talu que la batura debaxo d’esta (solhorru). ¿Por qué lo facien tan escaso? Nel sieglu XVIII la talla media del campesín asturianu andaría al rodiu del metru y mediu.

L’horru mídese pola so colondra: o lo que ye otro tanto, de centru a centru de los pegollos. L’horru de cinco metros ye’l “grande”. La cámara mide venticinco metros cuadraos, y añadiendo un mínimu d’un metru de bistechu, resulta un tomu cubiertu xemináu. Pal de cuatro metros salen seice de cámara y treinta y seis cubiertos.

Les puertes más antigües facíense con una colondra ancha abondo; o con dos, que se xuníen pola parte interior con pinazos y tornos. Revira sobro los guizos birllicaos nel trabe y el lliñu. Davezu alcuéntrense puertes de perfechura más moderna, pero si l’horru ye antiguu, al abriles veremos los guizos orixinales.

Arriendes de la puerta primacial, podien facese una o dos más, estreches y, xeneralmente, na parea a escontra. Son les portiques, y el so envís ye apurrir un estra de rodavientu. Abríense delles hores mentantu el dia, pero namái dellos dies.

Otra ameyoranza de rodavientu algámase faciendo dellos pequeños furaxacos na colondra, los ventanos, que de cutiu son gananciosos d’un biláu patente.

P'ameyorar el funcionamientu y percuriar la foliadura, forrábase’l guizu baxeru con un cueru, que se caltenía entafarráu con ensundia (de gochu, normalmente, que yera lo que había)

Na puerta y sobro ella birllicábense antiguamente símbolos tradicionales d’abeyu. Estos aplicábense también a los ventanos, esfotando asina toles entraes.

Otres pieces que davezu s’alcuentren orniaes con talla son los lliños y, especialmente los cogotes o cabezueles.

Los lliños (lliñu) ( ... )

Los gatos (gatu) ( cadena, ... )

Les toques (toca) ( vigues del quesu, cruciyón, cadena, viga'l perru, ... )

Los lliños formen un nuevu cuadru, con vigues de seición menor que los trabes (15x20 cm. dicalluéu). Encuállense sobro la colondra con caxes o regadura, mesmo que los trabes, y xúnense ente elles nos corneyales a trincón. Esta xuntura córtase a unos tres quintos, dende riba, y nun necesita más. La pieza d’arriba tien de ser más gruesa, ya que sedrá la que más apoqueza cuando manguemos los aguilones. Colocamos anantia los llaterales, pa que los encuallamientos de los cuadros queden cambiaos. Agora podemos mangar la puerta nel so sitiu y, allugando el lliñu alanteru, queda “enguiciada” y a poblo.

A unos 60 cm. per cada llau del corneyal encaxínense los gatos, encuallaos nos lliños con una “cola de milano”, que si’l gatu ye gruesu fadráse con trincón, pan nun afeblecer el lliñu.



	Metanes de los lliños encaxinamos les toques, encuallaes a estos con “cola de milano”, mesmo que los gatos. Esta xuntura tamién la vi con “boca de perro”, y con dambes concuayaes. En toles encualladures d’esti rayente déxase el cogote lo más llargu posible, poro quedarán ensin rapicar hasta que alluguemos los sobrelliños. Toles pieces tienen d’empañar bien cola plana cimera del lliñu.

Pa les toques cátense pieces narquiaes y asítiense cola panza haza riba, pa ameyorar l’altor valible de la cámara. La plana cimera llabrábase, ya que valía d’encontu pa les tables colos quesos que se dexaben a curar.

Poro l’aceición de “viga’l quesu”. Lo de “viga’l perru” camiento que ye pola mor d’una encualladura per-usada nos estremos. Tamién oyí a trechu qu’aende aforcaben los perros que nun valien.

Los aguilones (aguilón) (anguilón, ... )

El nanu (puntal, ... )

Los sobrelliños (sobrelliñu) (durmientes, touca (nel occidente), ... )

Otra solución mui usada ye la xuntura en “punta de diamante”, pa la que s’usa un nanu de la midida xusta, y los aguilones posen sobro elli. La rapicadiella de la tiesta ye una “punta de diamante” entornada. Pal sofitu nes esquines, cortamos el casqueru d’esquina na plana baxera del aguilón, de un cuartu de la grosez de la pieza. El restu del sentayu necesariu facémoslu enriba del trincón de los lliños, de mou que la regadura del aguilón quede bien al aire.

Sia que non, el nanu arrónciase o esquítase enantes d'aponer la teya.

Los aguilones son cuatro vigues de seición cuadrada y unos 15 cm. de llau, que dan forma a la cobertoria. Na plana cimera demozamos los cantos unos dos centímetros. Perbaxo de les aristes remanecies, a unos dos centímetros facemos sendes regadures, de tres per tres centímetros dicapronto. Pa facilitar el montaxe, colocaremos un poliyu metanes la cobertoria. De mano apeteramos dende el suelu hasta les toques y sobro estes mangamos el nanu de seición cuadrada, coles planes orientaes haza los requexos y coluxendo de la cobertoria. Cortamos en cada plana un casqueru en pina a un metru d’altor sobro’l planu de los lliños y afitamos la correspondiente barbidiella na tiesta del aguilón.

El sobrelliñu posa direutamente sobro’l lliñu y améstase a esti con tornos. La plana cimera arrimada, rasará dafechamente cola plana baxera de les regadures de los aguilones. Arriendes de rellenar la ralura ente cabrios y aguilones, retranca los encuallos de toques y gatos.

Esta pieza queda meyor si llabramos, en la plana baxera, un rebaxu de dos centímetros de fondura, dexando un petu de como poco dos centímetros, que topeta escontra el cantu interior del lliñu.

Nun hai una pauta xusta tocántenes a les escuadríes de les pieces. Camiento que cada casa fadría l’horru con aquello de lo que disponía. Ye fácil ver que los horros más grandes y reyeros atópense venceyaos a les cases grandes de cada aldea.

Tampoco l’hai al rodiu de les encualladures, prevaliendo siempres el sentir del carpinteru; condicionáu pela disponibilidá de madera.

Les tornapuntes (tornapunta) (tentemozu, rebosties, puntales, ... )

Los cabrios (cabriu) (cabios, cabi, ponton, ... )

Los tornos (tornu )

Los cabrios son los chaplones que conformen el encontu pa la cobertoria. Algámense aserrando les falques (troncos) con el tronzón y endrechando los cantos col hachu; aprovechando al máximu la madera bono. La resultancia ye que los chaplones tienen un estremu más estrechu, el correspondiente a la parte cimera del árbol.

La serradera fáise cola madera verde y la ensugadura a l’aire, atrocándola de la lluvia el vientu y el sol. Pa emponelos llábrense les planes y cantos con zuela y hachu, corrixendo alebecos y endrechando.

		Acabantes d’encaxinar los aguilones, asitiamos en cada requexu les tornapuntes de siete por siete centímetros. La xuntura facémosla con un balobru na plana baxera del aguilón; y un contíu en barbadiella na parte cimera de la xuntura de los trabes.

	Los tornos son tarranches de seición cuadrada, normalmente de carbayu, y el so llau mide tres o cuatro milímetros menos qu’el diametru de la parafusa que furara los cloyos onde van llantaos. Táyase la pica pa guiar la entrada y asítiase coles planes al empar de les de les pieces. L’agarre consíguese clavando lo cuadrao, en resultancia la pica tayada, ya xirenga y sobraya, tien de quedar adefuera de la encualladura.

Primero allugamos los cuatro cabrios más llargos, centraos sobro cada parea de la cámara. Lluéu allugamos un o dos a cada llau d’éstos, y en toles aguaes, precurando siempres premediar el mesmu pesu nes cuatro aguaes. A la mano riba córtase el demuezu afayadizu, y rebáxase perriba, hasta conseguir qu’asitie no fondero de la regadura de l’aguilón. Darréu afítase’l cabriu sobro’l lliñu con unu o dos tornos. El furacu tien de ser abondo llargu pa encuallar el lliñu y arriendes llantar la pica tayada del tornu tresallá de la encualladura. Pué trescalar al interior de la cámara y rapícase’l sobrayu.

Acolliñamos tolos cabrios cola tiesta más estrecha escontra l’aguilón, y el treme abre a xeitu d’abanicu hacia’l bistechu. Los demuezos sedrán cada vez más llargos, y podemos llegar a zarrar el requexu baxeru con una pina abondo llarga pa que pose sobro los lliños.

Los cabrios déxense llargos a velaxe, y rapíquense col ferruchu desque manguemos el calzu.

Dellos puristes refertien que faga cortes cola máquina. Pero toi seguru dafechu de que si los antiguos pudieren escoyer, ficieran otro tanto.

Determinamos el llargor de los cabrios según l’altor de la colondra, el tomu de la cámara y l’arrimadura de la cobertoria. El bistechu tien d’abeyar a los trabes de la lluvia en dies airosos, y el so llargor ta llendáu pel equilibriu de pesu col tomu interior de l’aguada. L’arrimadura de la cobertoria pué dar un poco de xuegu, y l’altor de la colondra ye’l factor más determinante.

Percima de los cabrios allugamos el calzu, qu’acorra’l perímetru de la cobertoria. Esta pieza tien d’algamar que la primer filera de teyes quede enfilerada coles siguientes, basquiando el antiestéticu defeutu de “teya pingona”. Per baxo va el faldón, colos estremos apuntando a les tornapuntes y sofitáu en nueves tornapuntes, o los piés de los corredores.

Na mayoridá de los casos, la bocateya echámosla en falta. Pué ser que’l so estaller seya namái estéticu, y pué ser en reduñes de refugase de l’añeramientu de páxaros “mayores”.

Pontes, colondres y cabrios fáense polo xeneral con madera de castañal. Yá encaxinemos estes partíes colos meyores chaplones, y agora falten pieces menores en seición y llongura.

La disponibilidá de “cazoyos” determinará les escuadries de calzos, faldones y otres. Arriendes de que estes pieces puen empatase a lo llargo.

El calzu ye una tabla ancha de seición en pina. De cuatro a cinco centímetros de grosez a un llau y un centímetru al otru. Améstase con dos tornos a cada cabriu (non como na semeya, que tan atornellaos)

El faldón ye una tabla de dicallueu 12 x 4 cm. y ye una pieza sofitada. Encaxérase nos aguilones y encolíngase con unos pocos tornos. Quedará encaxinada al mangar tornapuntes o piés.

La bocateya ye una tabla delgada, que ta bona de rapicar. Alcontréles siempres clavaes, poro téngoles per evoluciones modernes, al empar que los corredores.

Les teyes antigües yeren más gordes y mucho más pesaes que les actuales, masque la dimensión xeneral caltúvose. Acollíñense sugues, usando les que francíen pa forrar les canalexes y evitar el valumbu. En llugares airosos afitábense les teyes mangando piedres enriba d’elles. El cementu y la teya industrial apurrieron otru fustaxe, más pareyu, a los teyaos de los nuevos horros. Per contra, la utilización de morteru na igua de cobertories antigües dió una resultancia duldosa a mediu plazu. La facilidá da bola pal abusu y esto torna en delles tonelaes d’ataque, que finen estartayando y fundiendo les cobertories, ensin posibilidá d'igua. Arriendes del pesu, el contautu col cementu escome la madera.

Pal remanamientu y colocación de la teya ye per-importante caltener el pesu arramáu mesmo nes cuatro aguaes. Allugamos estayes estreches y hasta arriba, empicipiando pel centru y repitiendo n’aguada escontra.

Los aguilones cerceyen el planu de les aguaes, d’aende lo más afechiscao ye consideralos aguaes estreches. Esti remate rebaxa abondo l’altor de les limateses, y xemina el tomu encabalgáu nos empates.

Arriendes de que, si remataren namái con una lima, nun sedrien quien a asitiar les piedres.

Pical d’una sola limatesa, colocáu con morteru y que polo regular alcontraráse trupu dafechu

Nel cumal de la cobertoria tópense seice teyes, ocho canales y ocho cobixes, que tienen que se rapicar con procuru p’algamar un bon axuste y rayente. Sobro esta xunta mangamos una llábana, con una llixera entornadura haza el vientu primacial. Y a la fin el moñu. Esa llábana suelta de xuru bullirá al rebaliar l‘aire, asina que afitarémosla, como les teyes, mangando una piedra enriba.

Moñu, cabezueles, ventanos y puerta son les pieces predileutes pa facer figuranza en xeitu d’espresión artística. Y asina nun ye abegoso d’alcontrar moños birllicaos.

Les referencies más antigües tocántenes a les cobertories d’horros, llévennos al horru payizu y al horru tablizu. La cobertoria vexetal del primeru sigue vixente nel occidente d’Asturies y la Galicia guardarraya, pero sumióse dafechu de la fastera central. La cobertoria de tables de madera ye entá más rara. L’horru teyáu apoderó seliquino y ye’l que parvolez.

La subidoria ye una pasera más o menos confechada y construyida polo regular con piedra. También les ví de madera. Pa tornar l’accesu de royedores, fínase per fuera del trabe y a un altor inferior, d’unos cuarenta centímetros o más. A trechu constrúyese folleca, lo que permite agospiar nella al perru de la casa.

Pa facilitar l’accesu a la cámara encolíngase nel trabe una tabla de llicalluéu un metru de llargo y trenta centímetros d’anchor, la tenobia . sobro ésta podemos asitianos de piés y remanar a gustu la pesllera de la puerta.

Les más antigües tan engolaes con pieces de madera, tables o gaxartes. Con estribos de madera o metálicos y gatos también son corrientes.

Cuando s’incorpora’l corredor, más de recién, yá se dispón de clavos.

Los anchosos bistechos del horru recalden una batura asoverada del lloviu y nairada, afayadiza pa ensuchar dellos productos de la baragaña y de gran avíu pal abeyu d’arbios y trebeyos.

La talamera ye un chaplón anchu y enforma gordu que permite’l tránsitu enderredor de la colondra. Asítiase sobro les testeres de los trabes, o engolada d’éstos pentemedies de gabitos; enxamás encontada nes mueles.

Los gabitos engólense de los lliños per aciu de tornos. Algámense tarazando una caña del árbol xunto con un zaquitu del tueru perriba d’ésta, y la madera de fresnu ye mui amañosa. Los más grandes consíguense abangando y erreyando los retueyos xóvenes, y dexándolos crecer hasta qu’albonden el grandor afayadizu.

Talamera engolada de gabitos

Caxellos nes talameras

Sobro les testeres de los trabes, o alongando éstes per aciu d’almanques, allúgase una pieza non mui gorda, la pontiga. Ésta apetérase pente medies de gatos engolaos con estribos pa consiguir la rixidez riquida. Nel trabe clávase una carrera o “azafrán”. Sobro estes dos pieces allúguense llates curties tresversales; o cangos y tables llargues a la perllonga.

Si dalgo resquila n’Asturies ye’l terrén pandu, y el que hai, polo regular, acútase pa cultivos y pastiales. Les cases y los horros construyíense nes rimaes. Esto fai enforma interesante l’aprovechamientu n’altor.

Ye mui frecuente alcontrar horros construyíos sobro cortes, almacenes ya inclusive sobro cases. Nestos casos úsense pegollos de pocu altor, pero abondo pa que la ralura perfecha seya utilizable.

Ensuchar la bogada, recoyer la botada, el llabiegu, la parruscona y otros arbíos; atroxar lleña y madera p’astiala… Son los usos habituales del caramanchón.

La planta del horru ye dicalluéu cuadrada, y sofítase en cuatro pegollos. Mesmo teniendo seis pegollos , si la planta ye cuadrada sigue siendo horru, como ye’l casu de la primera de les vinientes imáxenes. La planta de la panera tien de ser un rectángulu bramente allargáu, y encóntase sobro tres o más pares de pegollos. La cobertoria aféchase en dos moños y ente dambos espárnase una trueya cumaliega. La llongura d’esta trueya ye talo que la diferencia ente’l llau llargu y el llau curtiu de la construcción.

La trueya cumaliega encóntase sobro cruciyones o tisories, siendo ésta la primacial desemeyanza constructiva con respeutu al horru.

Les caseríes más riques ya importantes teníen una mayor necesidá d’atroxu, y esti yera’l motivu pa entamar la construcción d’una panera. Pero muches ficiéronse comuñeres, ente dellos vecinos humildes, que nun algamaben pa tener cada ún el so horru ermunu, pero xuntos conseguíen tener una cuarta o sexta parte d’una panera. Poro, o porque repartiérase socesivamente n’heriedos, muches paneres teníen cuatro, seis o más puertes.

L’horru ye un recursu que sucierna una necesidá quizalera: La caltenencia de los alimentos. Y ésta nun ye una necesidá exclusiva d’una cultura d’una dómina o d’una fastera xegráfica. Ensin afonganar alcontré abondoses referencies , y delles coincidencies per-rescamplantes. Xenéricamente toos ellos son “celleros sobro columnes”. Les denomaciones orixinales, cuando les alcontré, deséñoles ente paréntesis.

Convídolos a dar “la retorniella’l mundu en cuarenta horros”

La cobertoria del horru cántabru ye beyusca; per contra hai más d’éstos na provincia de Lleón.

En dambes rexones ye marniego alcontrar l’horru de climen asturianu. Los arriostramientos a siesgu son una llanura que los estrema de los d’Asturies. Inoro si usen engüelgos, lo que pudiere ser el motivu d’estos recontios.

L’antiguu carpinteru llegaba col so sergón acullá onde lu llamaren. La madera que cortara y aserrara años atrás taba curada y a poblo pa usar.

Hachu y zuela pa llabrar les pieces; tronzón y ferruchu pa ferruchar y tarazar; porru, dos bedanos y un formón pa tallar les encualladures; llamen, forgu y rascón pa facer la puerta; la parafusa pa los tornos y la rasera “por si hai que facer dalgún detalle”. Tamién llevaba un aldraxu de lladera pa midir y trazar, y un corteyu de tocín pal recaldu de la ferramienta.

Dellos meses dempués, aquella casa estrenaba horru.


Occidente d’Asturies	Horru	Cabazu
Las cubiertas vegetales, las de losas y las de pizarra se construyen con mayor inclinación para su correcto funcionamiento	Galicia


Benin	Burkina-Faso	Madagascar	Kenia


Mali	Nixer	Xerra Leona	Uganda


Pilpayos	Pegollos	Mueles	Taces


Trabes - 1	Trabes - 2	Trabes - 3	Sovigañu


De mano guardábense los carros. Lluéu aportaron los tractores, equí los “Pascualinos” yeren los únicos valibles pa los estrechos caminos. Y agora que’l trabayu del campu va cayendo pel escaezu, guardamos los coches.


Vizcaya (Gereixa)	Navarra (Garaia)	Portugal (Espigueiro)


Australia, Tasmania	Indonesia (Tongkona)	Nueva Zelanda (Pataka)